Konsehal Abaday mihangyong masusi crematorium dihas Brgy. Bulua

Gihangyo ni Konsehal Roger Abaday, chairman sa Komite sa Senior Citizen, nga mapasusi ang operasyon sa crematorium diha sa barangay Bulua nga giingong mibuga og itom nga aso nga posibleng makadaot sa panglawas sa mga molopyo nga nahimutang dool sa dapit.

Kini ang unod sa special report ni Konsehal Abaday atol sa sesyon niadtong Lunes nga gidumala ni Bise Mayor Kikang Uy.

Sumala sa konsehal nga naghangyo ang mga residente sa dapit nga mapahunong ang pagbuga sa itom nga aso sa maong crematorium kay makahatag kini ug kadaot sa ilang panglawas.

Hinoon giklaro ni Abaday nga wala siyay pagsupak sa operasyon sa nasangpit nga crematorium ilabina niining panahon sa pandemya apan dili sad mahimo nga pasagdan kini kun ugaling makahatag og kadaot sa panglawas sa katawhan nga anaa molopyo sa maong dapit.

Nunot niini gisugyot ni Abaday nga masusi ang maong crematorium aron mawala ang kabalaka sa mga residente sa maong dapit.

Ang sugyot ni Abaday giduso ni Bise Mayor Kikang Uy ngadto sa komite sa Environment ni konsehal Enrico Salcedo alang sa tukmang aksyon ug rekomendasyon.