Kon. Rodriguez naghanyo og ayuda alang sa katawhan

Suportado ni Konsehal Jocelyn Bebot Rodriguez ang gipadangat nga special report ni Konsehal Lordan Suan atol sa sesyon ni-adtong Lunes nga gidumala ni Bise Mayor Kikang Uy.

Kini kabahin sa epekto sa Modified Enhanced Community Quarantine (MECQ) nga gipatuman ang syudad tungod sa pagsaka sa kaso sa Covid-19 diin pipila ka mga establisemento ang temporaryong misira hinungdan nga daghan ang nawad-an sa trabaho.

Sumala ni Konsehal Rodriguez nga ang bugtong paagi nga dili na mukaylap pa ang Covid-19 virus mao lamang ang pagpuyo sa balay ug aron nga dili na manggawas ang katawhan gikinahanglan usab kini nga matunolan sa ayuda sa goberno.

Nagtuo si Konsehal Rodriguez nga maminusan na ang mogawas sa ilang pinuy-anan aron mangita sa ilang panginabuhi-an kun adunay ayuda ang goberno ug dako ang posibilidad nga mokunhod dayon ang pagkaylap sa maong virus.

Nunot niini, nanghinaot ang konsehal nga pina-agi sa kooperasyon sa katawhan ug pagtubag sa panginahanlan makab-ot ang tinguha nga pagsumpo niini nga pandemya.