Kon. Nacaya nangusog mapatuman ang muffler ordinance

NANAWAGAN karon si Konsehal Ian Mark Nacaya sa hugot nga pagpatuman sa muffler ordinance.

Atol sa sesyon niadtong Lunes nga gidumala ni Bise Mayor Bebot Rodriguez, si Konsehal Nacaya nagkanayon nga nakadawat siya sa daghang reklamo gikan sa mga nagpakabanang residente kalabot sa kalanog ug kasaba sa mga tambutso sa mga sakayan ug motorsiklo, ilabina sa panahon sa kagabhion.

“Kini makadisturbo gayod sa katawhan ilabi na sa mga hamtong diha sa ilang pagpahulay o pagkatulog,”dugang sa Konsehal.

Gipasabot ni Konsehal Nacaya nga kinahanglan susihon ang mga namaligya sa mufflers kon sila ba mismo ang mihimo sa pagtangtang o kagustohan sa nagpalit sa muffler.

Subay niini, gihangyo ni Konsehal Nacaya ang Roads and Traffic Administration ug Land Transportation Office sa pagpatuman sa ordinansa kabahin sa mga mufflers.