Kon. Judith gustong mahan-ay programa sa IPs sa syudad

SI Konsehal James Judith, chairman sa komite sa arbitration, nanghinaot nga maplastar ang mga programa ug proyekto nga gihan-ay alang sa mga miembro sa Indigenous People (IP) sa syudad karong tuiga.

Kini ang gipaambit nga panahum ni Konsehal Judith agig reaksyon sa special report ni Konsehal Roberto Cabaring atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Judith nga nasinati sa milabayng tuig sa mga miembro ang kakulangon sa gahin atol sa ilang ritual nga kalihukan ug uban pang mga programa hinungdan nga miabag boluntaryo sa ginagmay nga tabang ang mga sakop sa Konseho sa Syudad.

Lakip sa gisugyot ni Konsehal Judith nga matino ug masiguro nga adunay Ancestral Domain ang mga sakop sa IPs sa dakbayan tungod kay adunay taho nga nadawat nga ang mga Indigenous People (IP) sa lalawigan sa Misamis Oriental lamang ang adunay ancestral domain, sumpay sa konsehal.

Niini malaumon si Judith nga karong tuiga masiguro na sa mga miembro nga mahan-ay ang tanang gikinahanlan alang sa ilang mga programa ug proyekto.