Kon Daba mihangyo mapadali ang katudloan sa college president sa City College of CdeO

SI Konsehal Suzette Magtajas-Daba, chairman sa komite sa edukasyon, hugot nga mihangyo sa konseho nga mapadali ang  katudloan ni  Dr. Jestoni  P. Babia  isip presidente sa City College of Cagayan de Oro (CCCO).

Kini ang reaksyon  sa Konsehal  sa sesyon niadtong Lunes nga gidumala ni Bise Mayor Bebot Rodriguez human gikwestyon ang salary grade 29 sa sugyot resolusyon nga magkompirma sa katudloan ni Dr. Babia.

Matod sa Konsehal nga ang SG 29 mao gayud ang standard rate sa usa ka university/college president nga nalatid sa Department of Budget and Management (DBM)-Index of Occupational Services (IOS).

Gipasabot ni Daba nga kapin sa usa ka tuig nga gitun-an sa iyang komite ang pagmugna sa City College uban sa buhatan sa Commission on Higher Education (CHED), Human Resource Management Office (HRMO), Local Finance Committee (LFC) ug uban pang mga ahensya sa gobyerno ug hintundang opisina sa City Hall.

Ang kompirmasyon sa katudloan ni Dr. Babia usa sa mga butang nga gikinahanglanon alang sa pag-ila sa institusyon gikan sa CHED, aron sunod tuig tingtungha dili na mogasto ang dakbayan kay ang nasudnong kagamhanan na ang magpundo lakip na ang tuition fee sa mga tinun-an nga na-enrol sa City College.  (RNQuiblat/SP)