Kon. Achas gihingusgan mabutangan og street lights ang Upper Puerto

GIPAHIMANGNUAN ni Konsehal Rustico Ian Achas, chairman sa komite sa fisheries and aquatic resources, ang tanang mosubay sa Upper Puerto Highway ning syudad nga mag-amping ug magbinantayon aron dili masugamak sa disgrasya sa kadalanan kini tungod kay ubay-ubay na nga mga aksidente ang gakahitabo dihang dapita.

Kini ang reaksyon ni Achas sa special report ni Konsehal Bernie Esparcia mahitungod sa kasamtangang sitwasyon dihas Sayre Highway Barangay Puerto, ning dakbayan.

Sumala ni Konsehal Achas nga hangtod niining panahona matawag pa nga delikado alang sa mga motorista ang maong dapit tungod sa kangitngit kay gikulang kini sa mga street lights ug road signages.

Gitataw usab sa konsehal nga ang Sayre Highway diha sa Barangay Puerto ubos sa pagdumala sa Department of Public Works and Highway (DPWH) ug walay hurisdiksyon ang lokal nga kagamhanan sa syudad.

Nunot niini, gisugyot ni Konsehal Achas nga magpadangat og sulat ang kagamhanang Lokal ngadto sa DPWH aron mahatagan kini sa tukmang aksyon ug solusyon aron malikay sa disgrasya ang katawhan. (MLRapanot/SP)