Komitiba sa Barangay Affairs motuki sa resolusyon saNazareth alang sa regular nga pagkolekta sa basura

TUKION sa komite sa barangay affairs nga gipangulohan ni Konsehal Yan Lam S. Lim ang resolusyon gikan sa Barangay Nazareth nga nag-awhag sa City Local Environment and Natural Resources Office (CLENRO) ug sa Tencil Construction, Inc. nga tumanon ang regular ug tukma nga iskedyul sa pagkolekta sa basura sa ilang barangay.

Sa maong resolusyon, gikabutyag nga ang Barangay Nazareth nakasinati sa dili regular nga pagkolekta sa basura, hinungdan sa pagdapon-og niini nga naghatag og dili maayong baho, ug peligro sa panglawas ug kahimsog sa mga molupyo.

Aron kini masulbad, nanawagan ang barangay sa CLENRO ug sa kontraktor sa garbage collection nga sundon ang regular nga iskedyul sa pagkolekta sa basura aron mapadayon ang kalimpyo.

Pinasubay sa Local Government Code of 1991, adunay katungod ang Sangguniang Barangay sa pagpatuman og mga resolusyon nga may kalabutan sa panglawas ug sanitasyon sa katawhan. (JAOclarit/SP/Photo by MarketMind website)