Komitiba ni Achas, Pascual tukion P2M proyekto para sa mangingisda

TUKION sa Komite sa Fisheries and Aquatic Resources ni Konsehal Christian Rustico Achas ug Komite sa Agriculture ni Konsehal Jay Pascual karong adlawa, Nobyembre 15, ang proyekto balor P2 milyones alang sa mga mangingisda sa coastal barangays ning syudad.

Mahinumduman nga si Konsehal Achas mihatag sa iyang special report atol sa milabayng sesyon sa konseho diin iyang gihingusgan nga unta hingpit nang madawat sa 24 ka asosasyon sa mangingisda sa dakbayan ang ilang ganti alayon sa programang Malinis at Masaganang Karagatan (MMK) sa Department of Agriculture-Bureau of Fisheries and Aquatic Resources.

Matud ni Achas, natunol na sa BFAR ang maong budget ngadto sa syudad niadto pang Mayo 2023 apan, hangtud karun, wala pa nadawat sa mga kapunungan ang ilang gihangyong ekipo ug kagamitan para sa ilang panginabuhian.

Nakita sa konsehal nga ang pakyas nga pagtambong sa mga hepe sa mga hintungdang buhatan, kinsa mao unta ang makatubag sa estado sa mga purchase request, usa sa nakapalangan sa proseso.

Nunot niini, gitahasan ni Bise Mayor Bebot Rodriguez komite ni Konsehal Achas ug Konsehal Jay Pascual sa pagtuki sa maong proyekto.

Gipadit sa maong tigom sila si City Administrator Atty. Roy Hilario Raagas, City Legal Officer Atty. Kenneth Tamala, ug City Agriculturist Paterno Gonzales, Jr.

Gihangyo usab sa pagtambong sila si Ms. Roxanne Mae Ravidas, acting city budget officer ug si Atty Joeffrey Namalata, city general services officer.