Komite sa urban poor motuki sa kahimtang sa 722 housing project

ANG Komite sa Urban and Rural Poor ubos ni Konsehal Edgar Cabanlas magtigom karong Mierkoles, September 27, 2023 diha sa hawanan sa Konseho aron pagtuki sa kasamtangang kahimtang sa 722 housing project.

Kini nunot sa special report ni Konsehal Bernie Esparcia nga nakisayod sa estado sa Japan Non-Project Grant Aid for Restoration and Prevention (JNGARP) kon 722 Housing Project dinha sa Pahiron, Lumbia nga gitagana alang sa mga survivors sa Bagyong Sendong.

Dugang hisgutan sa komite ang sulat hangyo sa usa ka molopyo sa Macabalan nga makolekta ang gibayad sa iyang housing unit gikan sa housing project nga “Salag” dinha sa Gate 1 sa Pier sa Macabalan nga giingong nasirado na ug wala pay update.

Gipaabot motambong sa tigom aron paghatag sa ilang panahom sila si Konsehal James Judith II, Girlie Balaba, John Michael Seno, Roger Abaday, Yvy Emano ug Bise Mayor Bebot Rodriguez.