Komite sa Trade and Commerce girekomendar ang hangyo sa BFP

HINIUSANG giuyonan sa Komite sa Trade and Commerce ni Konsehal George Goking nga marekomendar ngadto sa buhatan ni City Mayor Rolando Klarex Uy ang hangyo ni FSSUPT Rexcliburn Salvana, District Fire Marshal sa Bureau of Fire Protection sa syudad nga mahatagan og tipik sa gahin gikan sa Corporate Social Responsibility (CSR) nga pundo aron magamit pagpalit og dugang ekipo sa maong buhatan.

Atol sa tigom sa komite niadtong milabayng adlaw, gihangyo ni FSSUPT Salvana nga madugangan pagbutang ang mga barangay sa syudad ug mga fire substation, labi na ang dapit sa barangay Iponan, Carmen, Macabalan ug Pueblo De Oro sa Uptown nga bahin sa tuyo nga dali ang ilang pag-responde kon adunay sunog.

Giangkon usab sa mga opisyal sa Bureau of Fire Protection nga sa pagkakaron, gikinahanglan nila ang dugang firetrucks tungod sa paspas nga paglambo sa syudad aron dali nilang marespondihan ang tawag sa panginahanglan.

Niini malaumon si Konsehal Goking nga pinaagi sa ilang rekomendasyon ug hangyo ngadto sa buhatan sa Mayor, mahatagan kini sa tukmang aksyon ug solusyon.