Komite sa games motuki sa mga aplikasyon sa poker games

TUKION sa komite sa Games and Amusement ni Konsehal Roger Abaday ang aksyon ug rekomendasyon sa gihimong ocular inspection sa mga buhatan sa Building Official, City Engineer’s, City Legal, RCB ug uban pang ahensya sa goberno sa aplikasyon sa Pineapple Crown alang sa pagbutang og Poker room diha sa Corrales Avenue, Barangay 29 ug GenSan PokerClub Inc. sa Limketkai Mall, Lapasan.

Dako ang paglaum sa mga buhatang mipahigayon og pagsusi sa dapit diin gilaraw ipahimutang ang maong mga poker games nga nasunod sa mga tigdumala ang gabayan nga gisitar sa balaod alang sa maong matang sa operasyon.

Niini, si Abaday kanunayng nagpahibalo nga andam mo abi-abi ang lokal nga kagamhanan sa tanang magpapatigayon nga gustong mobobo sa ilang negosyo dinhi sa dakbayan.

Nunot niini, gidapit sa komite nga motambong sa umaabot tigom sa Mayo 9, 2023 sa alas 2 sa hapon, aron paghatag sa ilang panahum sila si city administrator Atty. Roy Hilario Raagas, city legal officer Atty. Kenneth Tamala, RCB chairman Atty. Jose Edgardo Uy, city building official Engr. Joel Momongan ug City Engr. Jenito Asequia.