Komite sa Games misusi sa bag-ong lokasyon sa GGJ Entertainment Corp

GISUSI sa Komite sa Games and Amusement ni Konsehal Roger Abaday sa milabayng adlaw ang bag-ong lokasyon sa GGJ Entertainment Corporation nga nag-operate og Electronic  Bingo ug E-Games.

Kini may kalabotan sa hangyo sa kompanya nga maamendar ang Resolution No. 12751-2017 aron mailisan ang business address ug mabalhin sa bag-ong lokasyon diha sa Barangay 27 gikan sa Barangay 11, ning syudad.

Si Kapitan Pedro Mabulay, sa Barangay 27, mibutyag nga kun maaprobahan  kini iyang  gihangyo  ang operator  nga pangitaan gayud sa insaktong parking area ang ilang mga kliyente aron dili makadisturbo sa mga residente.

Niini, gihatagan sa  komite og duha ka semanang tagal pagduso sa ilang report ang Office of the Building Official (OBO) alang sa building classification, City Engineering Office (CEO) alang sa  aktwal nga distanya gikan sa mga tunghaan  ug simbahan  ug sa barangay  pagsagop  sa resolusyon nga  magpadayag sa ilang pag-uyon sa maong operasyon.

Ang pagsusi giubanan nila ni Konsehal Bernie Esparcia ug Ian Achas.