Komite sa games mihatag panugot sa GGJ Entertainment pagbalhin sa dapit

GIDUSO sa Komite sa Games and Amusement ni Konsehal Roger Abaday ngadto sa opisina sa City Legal alang sa dugang pagtuon  ang mga gisumiteng dokumento sa GGJ entertainment corporation.

Kini human ang buhatan sa City Engineers atol sa tigom sa komite niadtong Martes  nagpadangat sa ilang rekomendasyon nga nagpadayag walay pagsupak sa operasyon sa kompanya  human niini nasunod ang mga  gabayan ug rekisitos nga gisita sa gobyerno.

Mahinumduman  nga gihangyo ni Mr. Gonzalo Go Jr., tigdumala sa korporasyon,  nga ibalhin  ang operasyon sa ila ra usab  nga establisamento nga nahimutang sa Pedro Mabulay St., Barangay No.27.

Hinoon, mipasabot si Konsehal  Abaday nga ang kagamhanang lokal kanunay nga mo-akomodar sa mga negosyante nga gustong mubobo sa ilang negosyo sa syudad kay gawas nga makatabang kini sa kinitaan maghatag usab kini og trabaho sa katawhan.

Niini, gipasalig ni Konsehal Abaday nga kanunay siyang magpaluyo og mosuporta sa mga negosyante  nga gustong mamuhonan dinhi sa dakbayan.