Komite sa Env’t nangusog masolusyunan problema sa baho dihas Upper Puerto

Ang Komite sa Environment ni Konsehal Roger Abaday nangusog nga masolusyunan ang problema sa baho gikan sa Misamis Oriental Rendering Corporation (MORC) plant sa Upper Puerto, ning syudad.

Sa milabayng tigom sa komite, si Bise Mayor Bebot Rodriguez mismo ang mihangyo sa kadagkoan sa korporasyon nga mohimo sa mga lakang nga mawala gayud ang baho gikan sa operasyon sa planta tungod kay nakahasol na sa mga nanimuyong silingan gawas nga makadaut gayud sa panglawas.

Nasayran nga gabalik balik na ang reklamo sa operasyon sa planta apan wala gayud mahatagan sa igong pagtagad sa korporasyon butang nga gikadismaya sa mga sakop sa komite ug sa bise mayor.

Ang representante sa Department of Environment and Natural Resources (DENR-10) mibutyag nga adunay kalapasan ang operasyon sa maong planta tungod kay nakahatag na kini sa kasamok ug distruso sa katawhan ilabina nga nahimutang ang planta sulod sa residential area ug wala sa Industrial zone.

Niini, si Abaday miingon nga kinahanglan nga mapangitaan sa solusyonan ang problema apan iyang gitin-aw nga angayan usab protektahan ang interest sa kompanya tungod kay nakaamot kini sa kalamboan sa ekonomiya sa syudad.

Hinuon, matod niya kinahanglan nga motamod ang kadagkoan sa kompanya sa gisitar nga patakaran ug regulasyon sa gobyerno nga dili makadisturbo sa katawhan.

Dugang niini, si Bise Mayor Bebot Rodriguez nanawagan nga isumete sa kompanya ang ilang plano pagtubag sa problema sa kabaho sa operasyon sa planta.