Komite ni Cabanlas gihingusgan mga lakang batok pagbaha sa distrito 2

ISIP pagpangandam sa nagsingabot nga panahon sa ting-ulan, ang Komite sa Public Works ubos ni Konsehal Edgar Cabanlas, nangusog nga mapatuman ang mga programa alang sa paglimpyo ug pag-desilt sa mga kanal, manhole, ug drainage sa Barangay Agusan, Bugo, ug Puerto kinsa kasagarang biktima sa pagbaha sa distrito 2, ning syudad.

Sa maong tigom, si Engr Brillo C. Colima, Jr., representante sa Department of Public Works and Highways - City Engineering District 2, misaysay nga ang ‘Operation Likay Baha’ team sa syudad nagpahigayon na og ocular inspection niadtong Oktobre 1, ning tuig arun masusi ang hinungdan sa pagbaha sa maong mga barangay.

Gibutyag ni Colina nga ang mga nagsaksak sinagol nga basura maoy nakabara sa dagan sa tubig sa kanal sa Bugo hinungdan nga muawas ang tubig sa dalan. Naa usab drainage nga nasulod sa usa ka private property nga kinahanglan gubaon arun hingpit nang matul-id ang drainage system sa maong lugar, sumpay ni Colina.

Sa iyang bahin, si Kapitan Lolita Wahing sa Barangay Puerto mitaho nga ang dakong kanal sa taas nga bahin sa Puerto ug Agusan ang gasalo sa tanang tubig gikan sa mga housing development projects nga maoy hinungdan sa pag-awas sa tubig sa mga kabalayan bisan paman hinay ang ulan.

Nunot niini, ang Cebu Landmasters Inc. ug A Brown Company Inc., developers sa maong mga housing projects, misaad nga mo-kooperar sa joint inspection nga ipahigayon sa komite karung Oktober 16 arun masuta ang gamut hinungdan sa maong problema. 

Si Konsehal Cabanlas mipasabot nga pinaagi sa hinayhinay apan hiniusang pagpaningkamot sa komite, mga nagkadaiyang departamento sa lokal nga kagamhanan, national government agencies, student volunteers, contractors, ug kabarangayan, maminusan ang pag-antos sa mga residente sa pagbaha.

Mahinumduman nga nasugdan na sa komite ni Cabanlas ang programa sa syudad batok pagbaha diha sa distrito uno niadtong Septiyembre 12, ning tuig.

Ang maong tigom gitambongan usab nila ni Konsehal Malvern Esparcia, Aga Suan, ug Yvy Emano.