Klarex mipasalamat sa konseho sa City College ordinance

Dako ang pasalamat ni Mayor Klarex Uy sa konseho sa syudad ubos ni Bise Mayor Bebot Rodriguez sa tiunay nga suporta sa iyang programa nga libreng kolehiyo alang sa kabatan-onan. Sa sinemanang pagpakayab sa nasudnong bandila kagahapon, ang mayor mibutyag nga dili mahatagan sa katumanan ang programa kun wala ang suporta ug pag-abag sa konseho aron mapalabang ang ordinansa nga nagmugna sa City College of Cagayan de Oro. Adunay pipila ka kurso nga mahimong pilian sa mga umaabot magtutungha sa kolehiyo subay sa giuyonan nga ordinansa, dugang sa mayor.

Salamat gayud sa tanang sakop sa konseho nga mibulig sa programa ug dako ang akong panghinaut nga mapatuman na kini sa umaabot nga pag-abli sa bag-ong tuig tingklase, pamahayag ni Mayor Klarex Uy.

Mahinumduman nga ang ordinansa nga gipalabang sa konseho nga gipaluyohan sa komite sa edukasyon ni Konsehal Suzette Magtajas-Daba naglatid sa mga pasiunang kurso sama sa Bachelor of Science in Agriculture (BSA), Bachelor in Science in Information System (BSIS), Bachelor of Science in Entrepreneurship (BSE), Bachelor of Science in Environmental Science (BSES), Bachelor of Science in Sanitary Engineering (BSSE) ug Bachelor of Science in Industrial Security Management (BSISM).

Mahimo usab nga technical o’ vocational ang kurso nga kuhaon sama sa Agriculture, Fisheries, and Forestry; Construction; Creative Industries; IT-BPO; Health, Wellness and Other Social Services; Tourism, Hotels and Restaurants ug Ladderized Diploma Programs ug Specialized Trainings sama sa Micro-Certificates on Emergent Technologies sama sa Artificial Intelligence, Data Science Analytics, Cybersecurity, ug Internet of Things ug Cloud Computing.