Klarex gihataga’g katungod makig-negotiate sa mga banko alang sa P2.5B nga loan

ANG Konseho sa Syudad ubos ni Bise Mayor Bebot Rodriguez, sa sesyon niadtong Lunes, mipasaka og resolusyon nga naghatag og katungod ni Mayor Klarex Uy nga mangita og banko nga makapahulam sa dakbayan og P2.5 bilyones.

Si Konsehal Edgar Cabanlas, Majority Floor Leader, mipasabot nga posibleng dili lang ang Land Bank ang makapahulam sa maong kantidad nga makabentaha alang sa kagamhanan sa dakbayan.

Mahinumduman nga una nang miduso ang mayor sa hangyo nga mahatagan og katungod sa paghulam og P2.7 bilyones aron magamit pagpalit sa loteng tukuran sa gisugyot nga bag-ong City Center dinha sa Upper Dagong, Carmen ingon man pundong magamit alang sa pagpalambo sa luna ug pagtukod sa bag-ong City Hall Complex.

Ang lakang nahisgutan sa gipahigayong hiniusang tigom sa Komite sa Ways and Means ni Konsehal George Goking ug Komite sa Panalapi ni Konsehal Yan Lam Lim sa milabayng semana.