Kikang malaumon makatabang sa mga mag-uuma FMR projects

MALAUMON si bise mayor Kikang Uy nga makatabang sa kinabuhi sa mga mag-uuma ang pagpatuman sa pipila ka proyekto sa Farm to Market Roads (FMR).

Kini human ang konseho migahin og 10 porsyentong paatbang pundo alang sa pagsemento sa Sitio Bato barangay Dansolihon FMR balor P1 ka milyon nga ipatuman sa Department of Public Works and Highways (DPWH-10) Cagayan de Oro City – 1st District Engineering Office.

Nasayran nga ang proyekto mobalor og P11 milyones diin ang dakbayan gikinahanglang mogahin og P1 ka milyon isip paatbang pundo. Kini kuhaon gikan sa “Special Programs/Projects:

Upgrading/Concreting of Farm to Market Road (LGU Equity) ubos sa Agricultural Productivity Office (APO) sa 2021 Annual Budget.

Niini, ang konseho mihatag og panugot ni mayor Oscar Moreno pagpirma sa gikinahanglang Memorandum of Undertaking (MoU) tali sa Department of Public Works and Highways (DPWH-10) Cagayan de Oro City – 1st District Engineering Office ubos ni District Engineer Virginia Batocail alang sa pagpatuman sa nahisgotang kolaborasyon.

Ang ordinansa nga gipalabang sa konseho alang sa maong katuyuan gipaluyohan sa komite sa panalapi ni konsehal Edna Dahino ug komite sa pamalaod ni konsehal Ian Mark Nacaya.