Kaso batok kapitan sa brgy 17 gibasura

Gibasura sa komite sa ethics and blue ribbon ni Konsehal Edgar Cabanlas ang gipasakang kaso batok sa kapitan sa Barangay 17. Kini human ang komite nagtigom sa milabayng semana ug nasuta nga dili na interesado ang nanumbong human wala kini mitunga sa gipahigayong pagdungog sa iyang kaso.

Hinuon, ang mireklamo misumete ngadto sa komite sa kasabotan nga ilang gilagdaan tali ni Kapitan Jerico Ebabacol. Niini, si Cabanlas mipakanaug sa orden nga nagbasura sa maong sumbong taliwala nga walay gipasakang motion to dismiss ang sinumbong tungod sa kakulangon sa interes sa mireklamo nga ipadayon ang kaso. Ang tigom sa komite gitambongan nila ni Konsehal Yvy Emano ug Roger Abaday.