Kaso batok kapitan sa Balulang gibasura

Hiniusang gisagop sa konseho sa syudad ubos ni Bise Mayor Bebot Rodriguez ang resolosyon nga giluwatan sa Komite sa Ethics and Blue Ribbon nga nagbasura sa kasong gipasaka batok kang Kapitan Edwin E. Micabani sa Barangay Balulang. Ang resolosyon mipadayag nga walay basihan ang reklamo hinungdan nga gibasura sa komite ang sumbong.

Mahinumduman nga unom ka mga barangay tanod sa Balulang ang mireklamo alang sa “usurpation of official function, abuse of power, serious misconduct, conduct prejudicial to the best interest of service” ug kalapasan sa Graft and Corrupt Practices Act human matod pa gitangtang sila sa panerbisyo sa kapitan.

Napatud-an nga ang mga nanumbong dili mga sakop sa Barangay Tanod kun dili mga trabahanteng nakakontrata sa barangay base sa job order contract nga ilang gipirmahan.

Ang resolosyon nga giluwatan sa komite gipirmahan nila ni Konsehal Edgar Cabanlas, Jose Pepe Abbu Jr., Roger Abaday, Romeo Calizo ug Girlie Balaba.