KASIMBAYANAN program sa kapolisan gisuportahan

Hugot nga gipaluyohan sa komite sa public order and safety ni Konsehal Romeo Calizo ang Community Mobilization Program sa kwerpo sa kapolisan nga ginganla’g KASIMBAYANAN.

Sa milabayng tigom sa komite, gipasabot sa kadagkoan sa kapolisan nga ang programa naglambigit sa KApolisan, SIMBAhan ug pamaYANAN.

Kini usa ka programa diin magtabayayong ang tanan dinha sa pagkab-ot sa malinawon ug hapsay nga komunidad.

Niini, si Konsehal Roger Abaday uban ni Calizo boluntaryong nagtanyag sa ilang kahibalo ug kahanas dinha sa pagpahigayon sa mga pagbansay bansay sa mga moduyog sa programa.

Sa maong higayon, ang komite miduso og sugyot resolosyon nga magsagop sa maong programa sa kapolisan aron mapatuman sa hingpit dinhi sa dakbayan sa Cagayan de Oro.