Kapin P52M budget sa Kauswagan giuyonan sa konseho

Mapatuman na sa barangay Kauswagan ang ilang mga programa ug proyekto nga gipundohan karong tuiga.

Kini human giuyonan sa konseho sa syudad ubos ni Bise Mayor Bebot Rodriguez ang kapin P52 milyones nga annual budget sa barangay diin lakip sa gipundohan mao ang P7.47 milyones balor nga mga proyekto sa imprastraktura ubos sa 20% Development Fund (DF).

Nasukip sa gipundohan sa maong 20% DF ang pagtibawas sa proyekto pagtukod sa concrete drainage gikan sa St. Therese paingon sa Mimin Rosal balor P2 milyones; pagsemento sa dalan paingon sa Calderon Area, Zone 6 (P500 mil), Tinago, Phase II, Zone 6 (P500 mil), pathway sa Zone 5A (P50 mil), Zone 5B (P50 mil), Zone 2 (P50 mil) ug Zone 4 (P50 mil); pagsemento sa dalan sa Zone 4 (Basak) balor P400 mil; pagtukod sa ECCD Building nga hitsas sa playground amenities balor P2 milyones; basketball court sa Sabanal Compound, Zone 1 (P400 mil); pagtibawas sa concrete drainage sa St. Ignacius Extension, Zone 2 (P1 ka milyon); pagtibawas sa pagsemento sa Aquilles Extension, Zone 6 (P400 mil), ug pagtul-id sa drainage sa Dove Street paingon sa Harpy St., Zone 1 balor P71,517.00.

Niini, ang konseho sa sesyon niadtong Lunes, misagop og resolosyon nga nag-uli sa ordinansa sa barangay Kauswagan aron mapatuman ang gihan-ayng mga plano, programa ug proyekto karong tuiga. Ang maong resolosyon gipaluyohan sa komite sa barangay affairs ni Konsehal Alam Lim ug komite sa pamalaod ni Konsehal Ian Mark Nacaya.