Kapin P150M infra projects mapatuman

MOBALOR og P150,828,203 nga mga proyekto sa imprastraktura ang mapatuman pa karong tuig 2024.

Kini human ang Konseho sa Syudad, sa sesyon niadtong Lunes nga gidumala ni Bise Mayor Bebot Rodriguez, mipalabang sa ordinansa nga nag-aprobar sa Supplemental Budget No. 2 sa General Fund balor P335,890,497 ug Supplemental Budget No. 2 sa Special Account: Local Economic Enterprises/Utilities balor P48,693,825.

Si Mayor Klarex Uy mirekomendar ngadto sa konseho sa pag-aprobar sa maong supplemental budget uban ang pagpasabot nga tinguha niini nga mahaum sa prayoridad sa iyang administrasyon ang ipatumang mga programa ug proyekto karong tuiga.

Lakip sa gipundohan mao ang pagkonkreto sa mga dalan ug rehabilitasyon sa drainage system sa Block 12, 15 ug 16 sa CDORSHIP, Phase 1, Canitoan nga balor P33,473,675; pagtukod sa Balongkot Water System, Barangay Dansolihon balor P582,050; pagtukod sa mga drainage system diha sa dalan sa Kinasanghan balor og P3,129,985;  Purok 5, Barangay Puerto balor P2,089,493; 4th Street-21st Street, Barangay Nazareth (Phase 2) balor P5,615,000; road reblocking o pagpaayo sa dalan nga adunay drainage system diha sa farm to market road sa FS Catanico balor P5 milyones.

Samtang gipundohan usab ang pagbukas sa dalan sa access road padulong sa City Hall Employees Housing project balor og P12 milyones; sa Masterson Avenue nga nagdugtong sa dalan sa Balulang (Phase 2) balor P40 milyones; pagtukod sa opisina alang sa Persons with Disabilities (PWDs) balor P2 milyones; pagtibawas sa mga facilidad diha sa Human Milk Bank ug Lactation Support Center (HMBLSC) balor P600 mil; sa Tulugan alang sa mga Lumad diha sa Sitio Canaan, Barangay Dansolihon balor P2,851,400; pagtibawas sa rehas diha sa Bulua Central School  balor P780 mil; sa Balubal Heights Early Childhood Care Development Center balor P2,498,100; Rio de Oro Boulevard Gate Barangay Consolacion exit point balor P208,500 mil; pagkumpleto sa Barangay Puerto Market balor P25 milyones ug pagrehabilitar sa Fire protection system sa City Hall nga mobalor og P15 milyones.

Ang maong mga proyekto gilantaw nga makatabang diha sa paghatag sa dugang kalamboan sa matag Kagay-anon.