Kanhi presidente Duterte gisagop nga anak sa CDO

Hiniusnag gideklara sa konseho sa syudad ubos ni Bise Mayor Bebot Rodriguez si kanhi presidente Rodrigo Roa Duterte isip adopted son sa dakbayan sa Cagayan de Oro.

Kini human si Konsehal Alam Lim, sa sesyon niadtong Lunes, mibutyag nga usa kini sa angayang mga lakang agig pasalamat sa kanhi presidente sa iyang tinud-anay nga serbisyo ug mga paningkamot alang sa kalamboan sa syudad.

Gibutyag nga lakip sa mga proyekto nga napatuman sa dakbayan sa panahon sa administrasyon ni Duterte mao ang coastal road nga nagsilbing by-pass road gikan sa barangay Gusa paingon sa Igpit, Opol; Flood Risk Management Project; New Western Diversion Road nga nagpakunhod sa travel time sa westeng bahin sa syudad; kampanya pagsumpo sa illegal nga druga ug dakong kontribusyon sa kaarangan sa mga barangay tanod.

Haum kaayo nga pasidunggan ug ilhon ang iyang pagpakabana sa atong dakbayan, pamahayag ni Lim.

Sa iyang bahin, si Bise Mayor Rodriguez mipadayag sa iyang dakong pag-uyon tungod kay siya mismo nakasinati nga adunay dapit sa iyang barangay kaniadto nga lisod masudlan apan karon libre nang masudlan tungod sa paningkamot sa kanhi presidente nga masumpo ang illegal nga druga.