Kampanya pagproteher sa kinaiyahan gipalapdan

HAYAN mapalapdan pa ang kampanya sa dakbayan sa Cagayan de Oro dinha sa pagproteher sa kinaiyahan.

Kini human ang konseho sa syudad ubos ni Bise Mayor Bebot Rodriguez mihatag og panugot ni Mayor Klarex Uy pagpirma sa Agreement of Cooperation tali sa United Nations Human Settlement Programme (UN-Habitat) nga naglangkob sa pagpatuman sa Technology-Based Plastic 3Rs Solutions and Integrated Livelihood Projects alang sa Materials Recovery Facility (MRF) Cooperative dinhi sa syudad.

Ag maong proyekto nasukip sa Healthy Oceans and Clean Cities Initiative (HOCCI) program nga gitumong sa paghitsas sa mga lokal nga kagamhanan ug komunidad sa nasud nga maminusan ang marine plastic pollution pinaagi sa pagpalig-on sa kapasidad sa pagsuporta nga mapatuman sa hingpit ang National Plan of Action on Marine Litter (NPOA-ML).

Dugang pa, ang programa naninguha usab nga mapalambo ang data collection ug solid waste management systems sa tibouk nasud.

Ang HOCCI usa ka regional project nga gipundohan sa gobyerno sa Japan ug gipatuman sa UN-Habitat dinha si Pilipinas sa pakigtambayayong sa mga global, national ug local partners.

Alayon niini, ang dakbayan gipaabot nga modawat og pundo balor US$149,934.00 nga bahinon sulod sa tulo ka installment sugod sa pagpatuman sa proyekto hangtod nga makompleto ang 90% niini.

Ang ordinansa nga gipalabang sa konseho alang sa maong katuyuan gipaluyuhan sa komite sa environment ni Konsehal Roger Abaday ug komite sa pamalaod ni Konsehal Ian Mark Nacaya.