Kampanya kontra droga sa Kauswagan gipalapdan

GILANTAWNG mapalapdan pa sa Sangguniang Kabataan (SK) sa Barangay Kauswagan ang ilang kampanya kontra droga.

Kini human ang Konseho sa syudad ubos ni Bise Mayor Bebot Rodriguez, sa sesyon niadtong Lunes, misagop sa resolusyon nga nag-uli sa resolusyon sa barangay diin nasukip ang 2022 SK Annual Budget nga adunay gibanabanang kinitaan ug galastohon balor P5,279,664.00.

Tipik sa gihatagan sa prayoridad sa SK sa barangay nga mapatuman karong tuiga ang mga programa nga naghatag og igong edukasyon ug impormasyon sa mga kabatan-onan kabahin sa anti-drug abuse.

Lakip usab sa gipundohan mao ang mga programa sa Adolescent Sexual and Reproductive Health, Health Services, Gender Sensitivity, Youth Employment and Livelihood, pagpangandam sa kalamidad, pagproteher sa kinaiyahan ug paugnat sa kusog pahaom sa kasaulogan sa Linggo ng Kabataan ug uban pang programa nga maghatag og dugang kalamboan sa ilang dapit.

Dugang niini, gigahinan usab sa SK sa barangay ang pagpalit og usa ka unit nga DSLR Camera, laptop, usa ka set sa computer ug printer, television, air conditioner ug mga muwebles ug gamit sa ilang buhatan sama sa lamesa, bangko ug cabinet.

Ang resolusyon nga gisagop sa konseho alang sa maong katuyuan gipaluyohan sa komite sa Sports and Youth Development ni Konsehal John Michael Seno ug komite sa pamalaod ni Konsehal Ian Mark Nacaya.