Kamahinungdanon sa STP gipangutana ni Esparcia

“DILI lang siya basta nga proyekto kay gusto nato, apan kinahanglan  gyud diay nga adunay Sewerage Treatment Plant ang Cagayan de Oro.”

Kini ang tubag sa pangutana ni Konsehal Bernie Esparcia, Chairman sa Komite sa Climate Change, ngadto ni Engr. Alexander Generoso Castro, Engineer lll sa Department of Public Works and Highways (DPWH-Central Office) human mipresentar sa gisugyot nga Sewerage Treatment Plant (STP) Project diha sa Barangay Bonbon atol sa sesyon sa Konseho niadtong Lunes nga gidumala ni Bise Mayor Bebot Rodriguez.

Sumala ni Esparcia nga maayo man ang proyekto apan gusto lang niya nga maklaro ang katuyoan  aron  nga dili matingala ang katawhan nga ang  kagamhanan mosulod  og  usa ka mahalon nga proyekto nga diin mogasto og dako taliwala nga aduna kini’y subsidy.

Si Engr. Castro mipasabot nga mahinungdanon kaayo ang proyekto tungod kay nasayod man ang tanan sa hulga sa mga water-borne disease nga nakuha tungod sa polusyon sa tubig sama nalang sa balita nga sarang  madungog didto  sa Manila Bay ug Pasig River kon  unsa ka pelegroso ang polusyon sa tubig diha sa panglawas sa katawhan.