Kalamboan sa disaster risk reduction, climate change action gilantaw

Gipaabot nga mahatagan pa sa dugang kaarangan ang pagpatuman sa mga programa kalabot sa Disaster Risk Reduction (DRR), Climate Change Action (CCA) ug resiliency sa dakbayan sa Cagayan de Oro.

Kini human ang kagamhanan sa dakbayan naglaraw nga palapdan pa ang pakigtambayayong tali sa pipila ka pribadong sektor alang sa pagpatuman sa “Adopt-A-City” initiative.

Sa nadawat nga rekomendasyon sa konseho sa syudad ubos ni Bise Mayor Bebot Rodriguez, gipaabot nga uyonan ang Memorandum of Understanding (MoU) tali sa National Resilience Council (NRC), Carlos P. Romulo Foundation for Peace and Development (CPRF), SM Prime Holdings (SM) ug Xavier University alang sa subling pagpatuman sa programa dinhi sa syudad.

Pinaagi sa nahisgotang MoU, padayong mapalig-on ang kolaborasyon tali sa pribado ug publikong sektor dinha sa pagpangita og science-based solutions sa daghang hagit sa disaster resilience ug pagpatuman sa hingpit sa Sendai Framework for Disaster Risk Reduction 2015-2030.

Ang sugyot nga MoU giduso ngadto sa komite sa Climate Change Adaptation and Mitigation and Disaster Risk Reduction.