Kagay-anong grand winner sa GSIS nat’l painting contest gipasidunggan

GIPASIDUNGGAN sa Konseho sa Syudad ubos ni Bise Mayor Bebot Rodriguez ang Kagay-anong grand winner sa Government Service Insurance System (GSIS) National Painting Competition 2023. Sa sesyon sa konseho kagahapon, gisagop ang resolosyon nga nagpahalipay ug nagpasidungog ni Joseph Arao-Arao sa naangkong kalampusan niadtong Hunyo 16, 2023 didto sa GSIS Museum sa Pasay City.

Nasayran nga ang maong indigay tinuig nga gipasiugdahan sa GSIS ug gisalmotan sa gatosan ka mga artists sa tibouk nasud. Ang mananaug nga piyesa ni Arao-Arao ginganla’g “Uno’s Gentle Warmth”, ug anaa gipasundayag sa GSIS Art Collection sa GSIS Museo ng Sining sa Pasay City hangtod sa Agosto 31, 2023.

Ang gisagop nga resolosyon sa Konseho gipangamahan ni Bise Mayor Bebot Rodriguez ug sa tanang konsehal. Ang konseho mipasabot nga ang naangkong kalampusan ni Arao-Arao wala lang naghatag og garbo sa dakbayan kun dili makaaghat usab sa kabataang mahiligon sa pagpinta.

Ang maong resolosyon gipaluyuhan sa Komite sa Turismo ni Konsehal Jay Pascual ug Komite sa Pamalaod ni Konsehal Edgar Cabanlas. (photos by JBDacer and CDODev.com)