Kadiwa ng Pangulo, gisuportahan ni Goking

HUGOT nga gisuportahan ni Konsehal George Goking, chairman sa komite sa trade and commerce sa konseho, ang pagpahigayon sa Kadiwa ng Pangulo (KNP) matag bulan.

Kini subay sa Memorandum Circular No. 2024-003 nga giluwatan sa Department of the Interior and Local Government (DILG) nga  nanawagan sa partisipasyon  sa tanang lokal nga kagamhanan  sa maong programa  pinaagi sa pagpalabang og ordinansa  alang sa maong katuyuan.

Ang nasangpit nga  programa  maghatag kahigayonan  sa publiko  nga makapamalit og mga  produkto  sa ubos lamang nga presyo  ug usab  maghatag kasayon sa mga mag-uuma sa pagpamaligya sa ilang mga abot   nga dili na magproblema  pa  sa transportasyon.

Sumala sa representante sa Department of Agriculture (DA) nga ang konsepto  sa kadiwa mao nga kinahanglan  ubos sa 20 porsyento  ang mga  presyo  niini  kompara sa  mga presyo sa merkado.

Malaumon si Konsehal  Goking nga kini nga programa  dako og ikatabang sa mga mag-uuma diha sa kasayon sa ilang pagpamaligya  sa ilang mga abot  gawas nga mahatagan sa kahigayonan  ang katawhan  nga makapamalit  og produkto nga barato. (JRGalano/SP)