Kadagkoan sa BSP dapiton sa Konseho sa umaabot sesyon

GIDAPIT sa konseho sa syudad ubos ni Bise Mayor Bebot Rodriguez ang kadagkoan sa Bangko Sentral ng Pilipinas pagtambong sa umaabot nga sesyon.

Kini aron mahatagan sa dugang katin-awan ang sugyot ordinansa nga mag-establisar sa Paleng-QR PH Plus Program nga mag-aghat sa mga mamaligyaay sa kamerkadohan, tag-iya sa mga sari-sari stores, operator sa motorela, kapunungan sa mga operators ug drivers sa pampublikong sakyanan ug uban pang mga negosyante sa pagsagop sa QR PH Digital Payment system kon pagbayad gamit ang online system.

Sa sesyon, si Konsehal Bernie Esparcia, chairman sa Komite sa Climate Change, mipasabot nga usa kini ka sistema nga maghatag og higayon sa mga kliyente sa pagpili sa pamaagi sa pagbayad.

Matod niya nga sa maong PalengQR mahimong magbayad og cash o’ online payments agi sa Gcash, Maya ug uban pang matang sa online payment sa tinguha nga mahatagan sa kasayon sa pagbayad ang mga konsumedor.

“Walay supak ang konseho sa maong lakang apan adunay mga probisyon sa sugyot ordinansa nga buot mahatagan sa katin-awan sama sa pagpahamtang og multa o’ silot sa posibleng makalapas sa balaod,” pasabot ni Konsehal John Michael Seno.