Kabataan angay tudloan sa balaod -trapiko aron malikay sa aksidente-Kon. Pascual

GISUGYOT ni konsehal Jay Roa Pascual, chairman sa komite sa turismo, nga matudloan ang kabataan mahitungod sa mga balaod ug reglamento sa trapiko aron malikayan ang mga aksidente panahon sa ilang pagtabok sa kadalanan.

Kini ang gipaabot sa konsehal atol sa sesyon niadtong Lunes nga gidumala ni Presiding Officer Pro-Tempore Konsehal Edgar Cabanlas agig reaksyon sa taho ni Konsehal Bernie Esparcia kabahin sa kaluwasan sa mga estudyante diha sa kadalanan labina gayud sa mga tunghaan nga nahimutang dool sa highways ug mga dalan nga labih0an ka hoot ang dagan sa trapiko.

Matod sa konsehal nga didto sa Singapore, giapil sa curriculum ang pagtudlo sa kabataan kabahin sa mga balaod ug reglamento sa trapiko diha sa kadalanan, sa panahon sa ilang pagsakay sa train ug uban pang matang sa transportasyon.

Alayon niini, kusganong gihangyo ni Konsehal Pascual ang Department of Education sa (DepEd) paghimo og mga lakang pag-edukar sa mga tinun-an bahin sa balaod-trapiko aron sila makabaton og kahibalo aron nga makalikay sa disgrasya.

Nagtuo ang konsehal nga malikayan ang mga aksidente sa kadalanan kun sila adunay kahibalo kabahin sa mga reglamento ug balaod sa trapiko ug siya nanghinaot nga masuportahan kini sa tanan .