Kabarangayan angayan magbaton sa kaugalingong raft

USA sa problema nganong dili makalihok ang mga barangay panahon nga adunay pagbaha mao ang kawad-on sa ilang kaugalingong raft.

Kini ang reaksyon ni Konsehal Jocelyn Rodriguez sa taho ni Konsehal Edgar Cabanlas atol sa sesyon niadtong Lunes nga gidumala ni Bise Mayor Kikang Uy nga nag-awhag sa

tanang katawhan nga magbinantayon sa umabotay nga bagyo nga mohapak sa Mindanao.

Bisan pa man nga nakahan-ay na ang mga programa sa pagpangandam alang sa kalamidad, apan nakita sa konsehal nga walay saktong mga ekipo ang matag barangay nga magamit pag-rescue sa mga tawo’ng matanggong sa baha.

Dugtong sa konsehal nga mamahimong malikayan o maminusan ang mga panghitabo diha sa komunidad kung i-maximize sa barangay ang mga tukmang impormasyon aron nga makapreparar sama sa pagkaon, tubig ug uban pa alang sa pagpangandam sa umaabot nga bagyong Odette.

Hinoon nakakat-on naman ang katawhan human sa kasinatian sa miaging bagyong Sendong.

Nunot niini, si Konsehal Rodriguez hugot nga misuporta sa laraw’ng mag-awhag sa tanang barangay sa dakbayan sa pagpangandam niining panahona.

Malaumon ang konsehal nga kini nga bagyo dili unta makahatag og dakong kadaot ug epekto sa katawhan sa dakbayan.