Kaarangan sa katawhan sa Brgy 13 matagamtaman

DUGANG kaarangan ug kalamboan ang gipaabot matagamtaman sa katawhan sa Barangay No. 13.

Kini human ang Konseho sa syudad sa sesyon niadtong Lunes nga gidumala ni Bise Mayor Kikang Uy misagop sa resolusyon nga nag-uli sa ordinansa sa barangay diin nasukip ang ilang Annual Budget nga adunay gibanabanang kinitaan ug galastohon balor P3.99 milyones.

Lakip sa unang gihatagan sa prioridad sa barangay mao ang paghinlo sa ilang drainage, pag-instalar og electrical facilities ug pagtul-id ug pagmintinar sa multi-purpose hall.

Migahin usab ang barangay og igong pundo nga magamit sa kalamidad ug mga programa ug proyekto sa Sangguniang Kabataan nga gilaumang maghatag og kaarangan sa kinabuhi sa katawhan sa barangay.

Ang resolusyon nga gipalabang sa konseho alang sa maong katuyuan gipaluyuhan sa komite sa Barangay Affairs ubos ni Konsehal Yan Lam S. Lim ug komite sa Pamalaod ug Reglamento ni Konsehal Ian Mark Nacaya.