Kaarangan sa kapanginabuhian mahimo nga maangkon sa kababaehan -Suzette

DILI babag ang pagka-babaye dinha sa pagtunol og serbisyo alang sa pag-angkon sa kalamboan sa syudad ug sa tibook nasud.

Kini ang pamahayag ni Konsehal Suzette Magtajas-Daba, chairman sa Komite sa Edukasyon ug Sister City Relations sa konseho, ning panahon nga gisaulog ang Women’s Month.

Matod sa konsehal nga sa unang panahon ang papel sa kababaehan anaa lamang sa panimalay, mag-atiman sa mga anak apan karon gihatagan na og gahum ug katakos sama sa kalalakihan.

Gipasabot sa konsehal nga daghan nang kababaehan nga nakahupot og taas nga posisyon nga nahimong mayor, gobernador, kongresman ug bisan Presidente sa nasud.

Sa gawas sa nasud, daghang kababaehan nga nagwelder kay mas pulido motrabaho tungod sa gipakitang dedikasyon, gugma ug pagkaresponsable sa trabaho, sumpay sa konsehal.

Ang nakitang kabag-ohan timaan nga ang tanan adunay patas nga kahigayonan dinha sa pagdumala sa tagsa tagsa ka responsibilidad.

Niini, si Konsehal Suzette midasig nga dili angay nga mahadlok ug maulaw makigbisog alang sa katungod sa mga kababaehan.

Sa susamang higayon, ang konsehal miagni sa kababaehan nga magpahimulos sa mga programa nga giandam diha sa CdOTVI, Inc. aron mabansay ug mahatagan sa kahigayonan nga mapalambo ang kapanginabuhian.