Judith uyon sa operasyon sa Move It

UYON si Konsehal James Judith II sa operasyon sa Move It dinhi sa dakbayan sa Cagayan de Oro.

Kini human gituki sa milabayng semana sa tigom sa Komite sa Public Utilities (Roads and Traffic Management) ni Konsehal Romeo Calizo ang hangyo sa kadagkoan sa Move It, usa ka motorcycle taxi company, nga maka-operate dinhi sa syudad. Matod ni Judith nga ang maong tinguha maghatag og dugang pampublikong sakyanan nga makaserbisyo sa katawhan ilabina sa mga tinun-an nga lagyo ang panimalay sa mga tunghaan.

Hinuon, giingon nga adunay himuong testing period ang kompanya aron masuta kun gikinahanglan ba ang ilang serbisyo sa mga sumasakay sa syudad.

Dugang pa, gibutyag nga ang pagpalabang sa resolosyon nga maghatag og magrekomendar sa operasyon dili magpasabot nga gitugutan na sa pag-operate ang kompanya apan kini usa sa mga rekisitos dinha sa paglukat og business permit.