Judith nangusog mabalhin Provincial Animal Quarantine sa Bukidnon

GIHINGUSGAN ni Konsehal James Judith, Chairman sa Komite sa Arbitration, nga mabalhin ang Provincial Animal Quarantine Checkpoint nga nahimutang sa Upper Puerto ning syudad ngadto sa teritoryo sa lalawigan sa Bukidnon.

Kini ang unod sa special report sa konsehal  atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Konsehal Judith nga tataw man sa geographical coordinates nga ang kanhi gitawag nga PBM kun Provincial Boundary Monuments nga karon gitawag na ug CBM kon City Boundary Monuments nga  nagsilbing utlanan sa dakbayan,  salikwa-ot kaayo nga ang Lalawigan sa Bukdinon mao ang nag- operate  sa gambalay niini.

Siya midugang nga aduna nay tulo ka managlahing resolusyon nga giduso ang konseho  nga diin ang pinakaulahi niadtong tuig 2006 nga naghangyo alang sa nasangpit nga katuyoan.

Nunot niini,  ang Konseho hiniusang misagop  sa bag-ong resolusyon  nga naghangyo kang Governor Neil Roque  nga mabalhin na ang Provincial Animal Quarantine Checkpoint didto sa ilang dapit.