Judith nahingawa sa pagpamutol og kahoy dihas DVsoria

Dako ang kahingawa ni Konsehal James Judith II sa nadawat nga posibleng pagpamutol sa dugang mga karaang kahoy dinha sa Divisoria.

Kini ang unod sa iyang special report, atol sa sesyon sa Konseho niadtong Lunes nga gidumala ni Bise Mayor Bebot Rodriguez, human namatikdan nga adunay dugang mga punuan dinha sa Divisoria ang gibutangan na og mga numero.

Siya mibutyag nga sa pagtukod sa moderno ug bag-ong gambalay sa OKK, ang kontraktor nakakuha og panugot gikan sa DENR alang sa pagpamutol sa pipila ka punuan diha sa Magsaysay Park.

Lakip sa giingong hinungdan sa pagputol sa mga karaang kahoy mao nga gakaukang ang concrete overlay o’ pavers block tungod kay dagko na ang gamut sa mga punuan, dugang sa konsehal.

“Ato kanang gisabot, wala na kitay daghang kiaw kiaw tungod kay alang man sa kalamboan sa dakbayan ug nagpadayag man kita og suporta sa Project Lunhaw,” pasabot ni Judith.

Niini, siya mipadayag sa iyang kabalaka uban sa kabalaka sa pipila ka mga Kagay-anon nga basin maupaw o’ mapilay na ang mga karaang punuan ilabina dinha sa monumento diin nagbarog ang El Pueblo A Sus Heroes tungod kay de numero na ang mga punuan nga nagpasabot nga putlononon na ang mga kahoy.

“Wala akoy pagsupak sa proyekto apan unta mabalanse kini nga ang pagatukurong mga edifisyo mahaum sa kasamtangang kahimtang sa dapit nga anaa ang dagko ug karaang mga kahoy,” pamahayag ni Judith.

Ang maong taho giduso ni Bise Mayor Rodriguez ngadto sa Komite sa Environment, Tourism ug Public Works alang sa makuting pagtuon ug rekomendasyon.