Judith misugyot matukod ang Tribal Justice System sa IPs

HUGTANONG gisugyot ni Konsehal James Judith, chairman sa Komite sa Arbitration, ang pagpalabang sa ordinansa nga magtukod og Tribal Justice System alang sa mga lumad sa syudad.

Kini sa katuyoan nga kon adunay panagbangi sa lumad, adto kini dad-on ug kini ang mosulbad niini agig pagtahod og respito sa ilang tradisyon, sumpay ni Konsehal Judith sa iyang special report atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Judith nga ang maong lakang dugay nang nasugdan sa syudad sa Davao ug sa lalawigan sa Bukidnon diin gitamod niini ang tribal justice system sa mga lumad ug gusto niining  mapatuman usab kini dinhi sa syudad.

Gani ubay-ubay na ka kapunongan sa mga lumad sa  syudad, diin 13 ka barangay sa unang distrito ug tulo sa segundo distrito nga gilangkuban sa Barangay FS Catanico, Cugman ug Tablon, sumpay sa konsehal.

Subay niini, gisugyot ni Judith nga maduso kini sa Komite sa Cultural Communities ni Konsehal Roberto Cabaring alang sa dugang pagtuon ug rekomendasyon.