Judith misugyot mapalambo Ysalina Bridge

“Angayan nang ma-upgrade ang Ysalina o’ Carmen bridge.”

Mao kini ang sugyot ni Konsehal James Judith II, atol sa sesyon sa konseho niadtong Lunes nga gidumala ni Presiding Officer Protempore Konsehal Romeo Calizo. Iyang gipasabot nga ang maong tulay natukod niadtong tuig 1931, hayan moabot na sa 92 ka tuig gikan sa pagkatukod niini ug ang unang desinyo mao ang usa ka truss bridge. Gani, kini niagi na sa pipila ka pagtul-id ug retrofitting.

“Apan, basi sa patakaran sa DPWH, tanang imprastraktura nga mokabat sa 50 ka tuig na gikan sa pagkatukod moagi gayud sa evaluation ug ang ilang rekomendasyon mao nga angayan na kining ma-upgrade ngadto sa 4 lanes,” pamahayag sa konsehal.

Gibutyag nga rason sa maong rekomendasyon ang kapaseguroan sa katawhan tungod kay gikabalak-ang dili na kini makalahutay kun adunay kusog nga pagtay-og sa yuta ug ang nagkataas nga volume sa mga sakyanan nga mogamit sa maong tulay. Siya misugyot sa pagpahigayon og tigom tali sa kadagkoan sa rehiyonal nga buhatan sa DPWH, heritage advocates ug ubang stakeholders aron mahatagan sa katin-awan ang maong lakang.

“Atong tugkaron ang isyu, ang usa ka butang komo kay daan dili mahimong dili ilisdan sa ngalan sa kalamboan ug kapaseguroan sa katawhan,” dugang ni Judith.

Ang maong taho giduso ni Konsehal Calizo ngadto sa Komite sa Public Works ni Konsehal John Michael Seno ug Komite sa Turismo ni Konsehal Jay Pascual alang sa dugang pagtuon ug tukmang rekomendasyon.