Judith misugyot mabutangan og pansayan ang Oro River Boulevard

Si Konsehal James Judith II mihangyo nga dili na gamitong dalan alang sa mga motorista ang Cagayan de Oro River Boulevard.

Kini ang sugyot sa konsehal atol sa sesyon sa konseho niadtong Lunes nga gidumala ni Bise Mayor Bebot Rodriguez, nunot sa pag-abli sa maong boulevard nga adunay katas-on nga 2.8 kilometro gikan dinha sa dalan JR Borja paingon sa Puntod-Kauswagan Bridge.

Matod ni Judith, apiki ang approach sa maong dalan tungod kay wala kini nahisubay sa standard tungod kay ang opisyal nga plano sa maong proyekto usa man ka flood risk control dike. Siya midugang nga ang katuyan sa proyekto makatabang sa kapiot nga dagan sa trapiko apan lisod kini mahitabo tungod kay alanganin ang approaches.

Niini, siya mihangyo nga dili na paagian sa sakyanan ang dalan samtang wala pa kini maablihan, ug gamiton na lang nga suroyanan alang sa mga magbiseklita, magdagan, ug maglakaw lakaw.

Hinuon, siya mihangyo nga mabutangan og pansayan o’ portalets ang dapit tungod kay iyang namatikdan ang kakulangon sa pansayan sa dapit. Ang river boulevard usa sa labing dako ug tsada nga mahimong suroyan ug kini garbo sa tanan.

Ang maong taho giduso ngadto sa mga Komite sa Public Works ni Konsehal John Michael Seno, ug Komite sa Public Utilities (Roads and Traffic Management) ni Konsehal Romeo Calizo.