Judith misugyot amendahan ang muffler ordinance

HUGTANONG gisugyot ni Konsehal James Judith, Chairman sa Komite sa Arbitration, nga ma-amendahan ang muffler ordinance sa syudad sa tumong nga mapatas-an ang multa aron maminusan ang mga  malapason sa balaod.

Kini ang gipaambit nga reaksyon ni Konsehal Judith sa special report nga gipadangat ni Konsehal Ian Mark Nacaya atol sa sesyon niadtong Lunes nga gidumala ni Bise Mayor Bebot Rodriguez kabahin sa mulo sa katawhan batok sa kasaba sa mga sakyanan nga gikuha ug tuyo ang muffler ug nakadisturbo sa katawhan.

Sumala sa konsehal nga daghan ang mga malapason sa maong  balaod tungod kay nakita nila ang kagamay sa multa nga gipahamtang. Nagtuo si Konsehal Judith nga maminusan ang reklamo batok sa banha ug saba nga mga tambutso kon patas-an ang multa sa mga malapason.

Nanawagan usab si Judith sa kapolisan nga hugot nga ipatuman ang nasangpit nga balaod diha sa ilang area of responsibility aron mahimong epektibo ang maong ordinansa.