Judith malaumon masolusyonan ang problema sa dulona sa St. John Tabacco

GITINGUHA ni Konsehal James Judith II, chairman sa komite sa arbitration, nga masolusyonan ang problema sa dulona tali sa Barangay Puntod ug Barangay Lapasan partikular ang Saint John Tobacco nga kasamtangang nahisakop sa Barangay Puntod.

Atol sa tigom sa komite, gipresentar nila ni Kapitan Alexis Dacer sa Barangay Puntod ug Kapitan Julito Ogsimer sa Barangay Lapasan nga sa milabayng pamunoan nila ni kanhi kapitan Alex Dacer sa Barangay Puntod ug Kapitan Bong Lao sa Barangay Lapasan, nauyonan nga ang ilang doluna sa  Saint John Tobacco  mao ang  tunga nga bahin  sa  Bitan-ag Creek apan sumala sa representante sa Buhatan sa Department of Environment and Natural Resources (DENR) kinahanglan masunod ang anaa sa technical description ug ang nalatid sa codified ordinance aron mahatagan katin-awan ang maong isyu.

Sumala ni Judith nga dili kini mahimong problema kung magkasinabot lang ang duha ka barangay ug mosumite sa ilang Barangay Joint Resolusyon nga nagpadayag sa ilang panag-sabot susama sa nasinati nga problema sa dulona sa Barangay Lumbia ug Barangay Bayanga nga nahatagan na sa tukmang  kasulbaran.

Aron malamdagan ang tanan ug mahatagan sa insaktong aksyon ug solusyon ang maong isyu, gisugyot ni Konsehal James Judith nga himoon sa komite ang pagpahigayon sa onsite ocular inspection sa dapit uban sa mga hingtungdan ahensya sa gobyerno sunod semana. (MLRapanot/SP)