Judith malaumon mapahimuslan ang bag-ong water treatment plant sa Brgy. Balubal

SI Konsehal James Judith, chairman sa komite sa arbitration malipayong nagpahibalo nga niadtong Marso 8 ning tuig, pormal nga gisubhan sa JE Hydro ug Task Force Patubig ang bag-ong water treatment plant nga nahimutang sa Barangay Balubal ning syudad.

Makapahimulos sa maong proyekto ang mga kasikbit nga barangay sama sa Barangay Agusan, Barangay Puerto, Barangay Alae ug uban pa, matod sa Konsehal sa iyang special report atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Judith nga ang nasangpit nga proyekto gilaumang maoy makapa-usbong sa ekonomiya sa maong dapit diin  tipik  kini sa long term development plan sa Cagayan de Oro Water District ug wala  kini malakip sa isyu sa COWD ug sa Local Water Utilities Administration (LWUA).

Siya midugang nga ang problema sa COWD dili ang pagpangita sa bulk water supplier, hinoon ang dugang ihap sa konsumante.

Nunot niini gisugyot ni Konsehal Judith nga tugotan o agnihon sa water district ang tanan interesadong magpapatigayon nga gustong mobubo sa ilang puhonan alang sa maong katuyoan ilabina  kadtong mga dapit nga minus ang suplay sa panubig ug ang paghatag insentibo niadtong mga magpapatigayon nga boot mohilambigit niini. (MLRapanot/SP)