Judith gitinguhang pasidunggan ang kapolisan

ANGAYAN pasidunggan ang kapolisan nga naningkamot nga madugangan ang police sub-station sa syudad alang sa seguridad sa katawhan.

Kini ang unod sa special report ni Konsehal James Judith atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Judith nga niining kasamtangan, adunay napulo (10) ka police station ang dakbayan diin sa matag estasyon, anaa sa upat ngadto sa lima ka mga barangay ang ubos sa ilang area of jurisdiction ug tungod sa hangyo sa molopyo sa Barangay Balubal uban sa konseho sa maong barangay natugotan ug pormal nga abrihan ang Balubal Police Station.

Dako kining tabang sa pagmintinar sa kahusay ug kalinaw diha sa Balubal, lakip na ang mga kasikbit nga dapit, matod sa konsehal.

Nunot niini, kusganong  gisugyot ni Konsehal Judith ang pagpasar sa resolusyon nga magpasidungog kanila ni P/Col. Salvador Radam, City Police Director, P/Maj. Sabino Labitad, Precinct Commander sa Puerto Police Station ug P/Master Sgt. Jale, team leader sa Balubal police  station tungod sa ilang tabang ug  paningkamot aron mapatuman ang labing bag-ong police station sa syudad.

Ang maong sugyot ni Konsehal Judith giduso ni Bise Mayor Bebot Rodriguez ngadto sa Komite sa Public Order and Safety ni Konsehal Romeo Calizo alang sa dugang pagtuon ug rekomendasyon.