Judith gitinguha masulbad ang problema sa Bitan-ag Creek

GITINGUHA ni Konsehal James Judith, chairman sa komite sa arbitration, nga masolusyonan ang dugay nang problema sa mga molopyo sa Barangay Lapasan ug Barangay Camaman-an nga maapektuhan panahon sa ting- ulan tungod sa pag-apaw sa tubig sa Bitan-ag Creek.

Kini ang unod sa special report ni Konsehal James Judith atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Judith nga sa iyang gihimong pakisusi sa dapit nasuta nga ang hinungdan sa pag-apaw sa tubig sa Bitan-ag Creek mao ang gabara nga mga basura sama sa sagbot, bato, balas ug mga punoan sa kahoy nga diin ug mag-ulan apektado sa pagbaha ang Cronin Village, San Miguel Village sa Barangay Camaman-an, J.R Borja Extension ug mga kasikbit nga dapit.

Siya midugang nga gitinguha sa mga apektadong residente ang paghinlo sa maong creek aron malikay sa baha  apan dili nila magahum tungod kay gikinahanlan ang paggamit sa backhoe ug dumptruck.

Niini gihangyo ni Konsehal Judith nga mahatagan kini  sa dinaliang  solusyon alang sa kapasigurohan sa katawhan panahon sa ulan.

Ang maong report giduso ni Bise Mayor Bebot Rodriguez ngadto sa komite sa public works ni Konsehal Edgar Cabanlas alang sa tukmang aksyon ug rekomendasyon. (MLRapanot/SP/Photos by JRGalano & CDO Encyclopedia)