Judith gitinguha mapalubong ang mga biktima sa Sendong

GITINGUHA ni Konsehal James Judith, chairman sa Komite sa Arbitration, nga mapahiluna sa insaktong lubnganan ang dul-an tresentos ka mga biktima sa Bagyong Sendong niadtong tuig 2011 nga hangtod wala pa maila sa mga tagtungod ug kasamtangan gisulod lamang  sa concrete vault.

Kini ang unod sa special report ni Konsehal James Judith atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Judith nga wala matibawas ang DNA extracting nga gipahigayon sa mga kawani sa National Bureau of Investigation sa maong mga biktima gumikan kay nahutdan kini sa pundo hinungdan nga nagpabiling wala sila maila hangtod ning panahona.

Gilaraw sa konsehal nga tuldokan na ang maong isyu aron mahupay na ang kaparentihan ug dawaton na ang kamatuoran nga kitang tanan temporaryo lamang dinhi sa kalibutan ug gusto niining ipahiluna pinaagi sa paghimo og seremonyas sa paglubong, dinapit ang mga pamilya.

Niini gisugyot ni Judith nga mopalabang ug duha ka resolusyon, una ang paghatag og insaktong pagpahiluna sa mga biktima sa lubnganan ug ang paghangyo sa buhatan sa NBI sa estado sa ilang gihimong DNA extracting.

Ang maong  sugyot ni Judith giduso ni Bise Mayor Bebot Rodriguez sa Komite sa Social Services ni Konsehal Girlie Balaba alang sa tukmang aksyon ug rekomendasyon.