Judith gitinguha mapadali procurement system sa BFP

GIKAHINGAWA ni Konsehal James Judith, Chairman sa Komite sa Arbitration, nga dili daling maka responde panahon sa sunog ang fire truck sa Macabalan Fire Station tungod kay guba kini ug adunay mga pisa nga hangtod karon wala pa napolihan.

Kini ang unod sa special report ni Kon. James Judith atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Judith nga gikabisgo sa mga residente sa Barangay Macabalan panahon nga adunay sunog sa ilang dapit tungod kay dili man maka responde ang maong fire truck gumikan kay adunay depekto.

Photo grabbed from Macabalan Fire Station FB page

Gitaho ni Judith nga mitabang pa gani ang konseho sa Barangay Macabalan sa pagpalit sa pump nga maoy hulip sa pisa nga nadaot apan ang problema kay dili kini haom, sumpay sa konsehal.

Nunot niini, gitinguha ni Konsehal James Judith nga mopalabang og resolusyon ang Konseho nga mag-awhag sa kadagkuan sa Bureau of Fire Protection nga mapadali ang procurement system sa maong buhatan ug maduso kini sa Komite sa Public Order ni Konsehal Romeo Calizo alang sa tukmang aksyon ug rekomendasyon.