JoyRide Superapp giuyonan sa Konseho

HAYAN mahatagan sa dugang kasayon ang katawhan diha sa  ilang pagpanakayan,  pagpahatod og  items, pagbayad,  ug uban pa.

Kini human ang konseho sa sesyon kagahapon nga gidumala ni Bise Mayor Bebot Rodriguez misagop og resolusyon nga nagpadayag sa walay pagsupak sa transport franchise operation sa JoyRide Superapp  nga nagtanyag sa ilang mga on demand nga serbisyo nga gilangkoban sa JoyRide MC taxi, JoyRide car, JoyRide taxi cab, JoyRide delivery, JoyRide taxicle ug uban pa.

Ang JoyRide Superapp usa kini ka ride-hailing apps nga nagserbisyo na sa liboan ka commuters sa lain laing rehiyon sa  nasud ug naghinam-hinam nga palapdan ang maabtan sa ilang serbisyo.

Giingon nga  kon sila maka-operate  sa dakbayan makatabang sila paghatag og dugang kinitaan  ug mapalambo ang kalidad sa kinabuhi sa mga bikers, pauswagon ang kasinatian sa pagpanakayan sa katawhan, makahatag sa dugang trabaho, adunay hingpit nga kaluwasan ang mga pasahero tungod naghatag silag safety training sa ilang mga drivers. Naghatag usab sila og insurance coverage sa mga drivers ug pasahero ug daghan pang  mga benepisyo.

Ang resolusyon nga gisagop sa konseho alang sa maong katuyoan  gipaluyohan sa Komite sa Public Utilities ubos ni Konsehal Romeo Calizo ug Komite sa Pamalaod ug Reglamento ni Konsehal Edgar Cabanlas.