JE Hydro interesadong mo-supply og tubig dihas Lumbia

Gipaabot nga masolosyonan na ang problema sa panubig sa bukid bukid nga bahin sa syudad.

Kini human ang konseho sa dakbayan ubos ni Bise Mayor Bebot Rodriguez misagop og resolosyon nga naghatag og pag-uyon sa laraw sa JE Hydro and Bio Energy, Inc. nga mo-supply og tubig dinha sa barangay Lumbia ug kasikbit nga barangay sa San Simon ug Baikingon.

Sa iyang special report, si Konsehal Ian Mark Nacaya mibutyag nga dako ang natabang sa kompanya dinha sa pagtubag sa panginahanglanon sa panubig sa barangay Indahag.

Nakita na nato ang kapasidad sa JE Hydro dinha sa pagsupply sa tubig ug tungod kay kini ang problema sa bukid bukid nga bahin sa syudad mapasalamaton kita sa tinguha sa kadagkoan sa kompanya nga dad-on ang ilang serbisyo didto, pamahayag ni Nacaya.

Dako ang paglaum sa konseho nga sa pagsulod sa JE Hydro dinha sa Lumbia masolosyonan na gayud ang dugay nang problema sa katawhan sa barangay.